Gajendra Sthuthi

śrī-bādarāyaṇir uvāca

evaḿ vyavasito buddhyā
samādhāya mano hṛdi
jajāpa paramaḿ jāpyaḿ
prāg-janmany anuśikṣitam (8.3.1)

śrī-gajendra uvāca

oḿ namo bhagavate tasmai
yata etac cid-ātmakam
puruṣāyādi-bījāya
pareśāyābhidhīmahi (8.3.2)

yasminn idaḿ yataś cedaḿ
yenedaḿ ya idaḿ svayam
yo ‘smāt parasmāc ca paras
taḿ prapadye svayambhuvam (8.3.3)

yaḥ svātmanīdaḿ nija-māyayārpitaḿ
kvacid vibhātaḿ kva ca tat tirohitam
aviddha-dṛk sākṣy ubhayaḿ tad īkṣate
sa ātma-mūlo ‘vatu māḿ parāt-paraḥ (8.3.4)

kālena pañcatvam iteṣu kṛtsnaśo
lokeṣu pāleṣu ca sarva-hetuṣu
tamas tadāsīd gahanaḿ gabhīraḿ
yas tasya pāre ‘bhivirājate vibhuḥ (8.3.5)

na yasya devā ṛṣayaḥ padaḿ vidur
jantuḥ punaḥ ko ‘rhati gantum īritum
yathā naṭasyākṛtibhir viceṣṭato
duratyayānukramaṇaḥ sa māvatu (8.3.6)

didṛkṣavo yasya padaḿ sumańgalaḿ
vimukta-sańgā munayaḥ susādhavaḥ
caranty aloka-vratam avraṇaḿ vane
bhūtātma-bhūtāḥ suhṛdaḥ sa me gatiḥ (8.3.7)

na vidyate yasya ca janma karma vā
na nāma-rūpe guṇa-doṣa eva vā
tathāpi lokāpyaya-sambhavāya yaḥ
sva-māyayā tāny anukālam ṛcchati (8.3.8)

tasmai namaḥ pareśāya
brahmaṇe ‘nanta-śaktaye
arūpāyoru-rūpāya
nama āścarya-karmaṇe (8.3.9)

nama ātma-pradīpāya
sākṣiṇe paramātmane
namo girāḿ vidūrāya
manasaś cetasām api (8.3.10)

sattvena pratilabhyāya
naiṣkarmyeṇa vipaścitā
namaḥ kaivalya-nāthāya
nirvāṇa-sukha-saḿvide (8.3.11)

namaḥ śāntāya ghorāya
mūḍhāya guṇa-dharmiṇe
nirviśeṣāya sāmyāya
namo jñāna-ghanāya ca (8.3.12)

kṣetra-jñāya namas tubhyaḿ
sarvādhyakṣāya sākṣiṇe
puruṣāyātma-mūlāya
mūla-prakṛtaye namaḥ (8.3.13)

sarvendriya-guṇa-draṣṭre
sarva-pratyaya-hetave
asatā cchāyayoktāya
sad-ābhāsāya te namaḥ (8.3.14)

namo namas te ‘khila-kāraṇāya
niṣkāraṇāyādbhuta-kāraṇāya
sarvāgamāmnāya-mahārṇavāya
namo ‘pavargāya parāyaṇāya (8.3.15)

guṇāraṇi-cchanna-cid-uṣmapāya
tat-kṣobha-visphūrjita-mānasāya
naiṣkarmya-bhāvena vivarjitāgama-
svayaḿ-prakāśāya namas karomi (8.3.16)

mādṛk prapanna-paśu-pāśa-vimokṣaṇāya
muktāya bhūri-karuṇāya namo ‘layāya
svāḿśena sarva-tanu-bhṛn-manasi pratīta-
pratyag-dṛśe bhagavate bṛhate namas te (8.3.17)

ātmātma-jāpta-gṛha-vitta-janeṣu saktair
duṣprāpaṇāya guṇa-sańga-vivarjitāya
muktātmabhiḥ sva-hṛdaye paribhāvitāya
jñānātmane bhagavate nama īśvarāya (8.3.18)

yaḿ dharma-kāmārtha-vimukti-kāmā
bhajanta iṣṭāḿ gatim āpnuvanti
kiḿ cāśiṣo rāty api deham avyayaḿ
karotu me ‘dabhra-dayo vimokṣaṇam (8.3.19)

ekāntino yasya na kañcanārthaḿ
vāñchanti ye vai bhagavat-prapannāḥ
aty-adbhutaḿ tac-caritaḿ sumańgalaḿ
gāyanta ānanda-samudra-magnāḥ (8.3.20)

tam akṣaraḿ brahma paraḿ pareśam
avyaktam ādhyātmika-yoga-gamyam
atīndriyaḿ sūkṣmam ivātidūram
anantam ādyaḿ paripūrṇam īḍe (8.3.21)

yasya brahmādayo devā
vedā lokāś carācarāḥ
nāma-rūpa-vibhedena
phalgvyā ca kalayā kṛtāḥ (8.3.22)

yathārciṣo ‘gneḥ savitur gabhastayo
niryānti saḿyānty asakṛt sva-rociṣaḥ
tathā yato ‘yaḿ guṇa-sampravāho
buddhir manaḥ khāni śarīra-sargāḥ (8.3.23)

sa vai na devāsura-martya-tiryań
na strī na ṣaṇḍho na pumān na jantuḥ
nāyaḿ guṇaḥ karma na san na cāsan
niṣedha-śeṣo jayatād aśeṣaḥ (8.3.24)

jijīviṣe nāham ihāmuyā kim
antar bahiś cāvṛtayebha-yonyā
icchāmi kālena na yasya viplavas
tasyātma-lokāvaraṇasya mokṣam (8.3.25)

so ‘haḿ viśva-sṛjaḿ viśvam
aviśvaḿ viśva-vedasam
viśvātmānam ajaḿ brahma
praṇato ‘smi paraḿ padam (8.3.26)

yoga-randhita-karmāṇo
hṛdi yoga-vibhāvite
yogino yaḿ prapaśyanti
yogeśaḿ taḿ nato ‘smy aham (8.3.27)

namo namas tubhyam asahya-vega-
śakti-trayāyākhila-dhī-guṇāya
prapanna-pālāya duranta-śaktaye
kad-indriyāṇām anavāpya-vartmane (8.3.28)

nāyaḿ veda svam ātmānaḿ
yac-chaktyāhaḿ-dhiyā hatam
taḿ duratyaya-māhātmyaḿ
bhagavantam ito ‘smy aham (8.3.29)

śrī-śuka uvāca

evaḿ gajendram upavarṇita-nirviśeṣaḿ
brahmādayo vividha-lińga-bhidābhimānāḥ
naite yadopasasṛpur nikhilātmakatvāt
tatrākhilāmara-mayo harir āvirāsīt (8.3.30)

taḿ tadvad ārtam upalabhya jagan-nivāsaḥ
stotraḿ niśamya divijaiḥ saha saḿstuvadbhiḥ
chandomayena garuḍena samuhyamānaś
cakrāyudho ‘bhyagamad āśu yato gajendraḥ (8.3.31)

so ‘ntaḥ-sarasy urubalena gṛhīta ārto
dṛṣṭvā garutmati hariḿ kha upātta-cakram
utkṣipya sāmbuja-karaḿ giram āha kṛcchrān
nārāyaṇākhila-guro bhagavan namas te (8.3.32)

taḿ vīkṣya pīḍitam ajaḥ sahasāvatīrya
sa-grāham āśu sarasaḥ kṛpayojjahāra
grāhād vipāṭita-mukhād ariṇā gajendraḿ
saḿpaśyatāḿ harir amūmucad ucchriyāṇām (8.3.33)

Copyright © 2018 www.godivinity.org. All Rights Reserved