Dhruva Sthuthi

dhruva uvāca

yo ‘ntaḥ praviśya mama vācam imāḿ prasuptāḿ
sañjīvayaty akhila-śakti-dharaḥ sva-dhāmnā
anyāḿś ca hasta-caraṇa-śravaṇa-tvag-ādīn
prāṇān namo bhagavate puruṣāya tubhyam

ekas tvam eva bhagavann idam ātma-śaktyā
māyākhyayoru-guṇayā mahad-ādy-aśeṣam
sṛṣṭvānuviśya puruṣas tad-asad-guṇeṣu
nāneva dāruṣu vibhāvasuvad vibhāsi

tvad-dattayā vayunayedam acaṣṭa viśvaḿ
supta-prabuddha iva nātha bhavat-prapannaḥ
tasyāpavargya-śaraṇaḿ tava pāda-mūlaḿ
vismaryate kṛta-vidā katham ārta-bandho

nūnaḿ vimuṣṭa-matayas tava māyayā te
ye tvāḿ bhavāpyaya-vimokṣaṇam anya-hetoḥ
arcanti kalpaka-taruḿ kuṇapopabhogyam
icchanti yat sparśajaḿ niraye ‘pi nṝṇām

yā nirvṛtis tanu-bhṛtāḿ tava pāda-padma-
dhyānād bhavaj-jana-kathā-śravaṇena vā syāt
sā brahmaṇi sva-mahimany api nātha mā bhūt
kiḿ tv antakāsi-lulitāt patatāḿ vimānāt

bhaktiḿ muhuḥ pravahatāḿ tvayi me prasańgo
bhūyād ananta mahatām amalāśayānām
yenāñjasolbaṇam uru-vyasanaḿ bhavābdhiḿ
neṣye bhavad-guṇa-kathāmṛta-pāna-mattaḥ

te na smaranty atitarāḿ priyam īśa martyaḿ
ye cānv adaḥ suta-suhṛd-gṛha-vitta-dārāḥ
ye tv abja-nābha bhavadīya-padāravinda-
saugandhya-lubdha-hṛdayeṣu kṛta-prasańgāḥ

tiryań-naga-dvija-sarīsṛpa-deva-daitya-
martyādibhiḥ paricitaḿ sad-asad-viśeṣam
rūpaḿ sthaviṣṭham aja te mahad-ādy-anekaḿ
nātaḥ paraḿ parama vedmi na yatra vādaḥ

kalpānta etad akhilaḿ jaṭhareṇa gṛhṇan
śete pumān sva-dṛg ananta-sakhas tad-ańke
yan-nābhi-sindhu-ruha-kāñcana-loka-padma-
garbhe dyumān bhagavate praṇato ‘smi tasmai

tvaḿ nitya-mukta-pariśuddha-vibuddha ātmā
kūṭa-stha ādi-puruṣo bhagavāḿs try-adhīśaḥ
yad-buddhy-avasthitim akhaṇḍitayā sva-dṛṣṭyā
draṣṭā sthitāv adhimakho vyatirikta āsse

yasmin viruddha-gatayo hy aniśaḿ patanti
vidyādayo vividha-śaktaya ānupūrvyāt
tad brahma viśva-bhavam ekam anantam ādyam
ānanda-mātram avikāram ahaḿ prapadye

satyāśiṣo hi bhagavaḿs tava pāda-padmam
āśīs tathānubhajataḥ puruṣārtha-mūrteḥ
apy evam arya bhagavān paripāti dīnān
vāśreva vatsakam anugraha-kātaro ‘smān

Copyright © 2018 www.godivinity.org. All Rights Reserved